समाचारसमाजहेडलार्इन

एसएमजीसहित हतियार लिएर सुनचाँदी पसल लुट्न जाने समुह पक्राउ

मोरङ,koshipos.com


एसएमजीसहित हतियार लिएर सुनचाँदी पसल लुट्न जाने समूह पक्राऊ परेका छन् । स्वचालित हतियार एसएमजीसहित मोरङको सुन्दरहरैचा नगरपालिका १० स्थित त्रिवेणी चोकमा एक सुनचाँदी पसल लुट्ने प्रयासलाई असफल बनाउउदै लुटेरा समुहलाई प्रहरीले पक्राउ परेको हो ।
पक्राउ परेका ६ जना लुटेराहरुको समुहलाई जिल्ला प्रहरी कार्यालय मोरङले बुधबार पत्रकार सम्मेलन गरेर सार्वजनिक गरेको छ ।

पक्राउ पर्नेहरुमा इटहरी २० तरहरामा डेरा गरि बस्ने संखुवासभा सभापोखरी ४ का ३९ बर्षीय प्रकाश भन्ने चन्द्रबहादुर राई, सुनसरीको गढी गाउँपालिका १ का ४५ बर्षीय डाईमण्ड भन्ने प्रमोद चौधरी, इटहरी २० तरहरामा डेरा गरि बस्ने संखुवासभा बाह्रबिसे ६ का ३० बर्षीय चिरञ्जिवि राई, मोरङको सुन्दर हरैचा ५ का २२ बर्षीय मिशन राई रहेका छन् । यस्तै, तरहरामा डेरा गरि बस्ने भोजपुरको पौवादुम्मा गाउँपालिका ३ का ३० बर्षीय नगेन्द्र राई र सुन्दर हरैचा ७ का ३१ बर्षीय सन्तोष राई रहेका छन् । उनीहरुलाई आज बिहान ३ बजे प्रहरीले नियन्त्रणमा लिएको हो ।

यो समुहले सुन्दरहरैचा १० त्रिवेणी चोकमा रहेका खगेन्द्र थापाको शिव पञ्चायन ज्वेलर्समा साउन १ गते दिउँसै करिब सवा १ बजे हतियार देखाएर लुटपाट गर्ने असफल प्रयास गरेको थियो । ज्वेलर्स लुट्ने प्रयास सफल नभएपछि उनीहरु फरार भएका थिए । उनीहरुले असार ३१ गते पनि सोही सुन पसलमा ३ वटा मोटरसाइलमा ६ जना आएर लुटपाट गर्ने योजना बनाए पनि सफल हुन नसके पछि बुढ खोला हुदै इटहरीतर्फ गएको प्रहरी अनुसन्धानबाट खुलेको छ । साथै, उनीहरुले हतियारलाई नमुना सामुदायिक वनमा रुखको टोड्कोमा लुकाएर राखेको पनि प्रहरीले जनाएको छ ।

यो समुह भोलीपल्ट पुनः सोही सुन पसल लुट्न हतियारसहित पुगेको थियो । प्रमोद चौधरी र चन्द्रबहादुर राई प्रवेश गरेका थिए । प्रमोदले कटुवा पेस्तोल र चन्द्रले एमएमजि बोकेका थिए भने अर्का एक जनाले अटोमेटिक पेस्तोल बोकेका थिए । अन्य ३ जना भने सुन पसलको वरीपरि निगरानी गरी बसेका थिए । तर उक्त दिन पनि उनीहरु सुन पसल लुट्न सफल हुन सकेनन् । हतियार सहित पुगेको समुहको गतिविधि सिसिटिभीमा कैद भएको थियो । जसले गर्दा प्रहरीलाई अनुसन्धान गर्न सहयोग पुग्यो ।

प्रहरीले लुटेराहरुले प्रयोग गरेको हतियारलाई सुन्दर हरैचा ५ स्थित नमुना सामुदायिक वनमा करमको रुखको टोड्काभित्र लुकाएर राखेको अवस्थामा वरामद गरेको छ । जिल्ला प्रहरी कार्यालय मोरङका डिएसपी एवं प्रवक्ता दिपक श्रेष्ठका अनुसार एक थान एमएमजी, एक थान म्याग्जिन र ६२ राउण्ड गोली वरामद भएको छ । यस्तै, अटोमेटिक पेस्तोल एक थान, म्याग्जिन १ थान र गोली २ राउण्ड फेला परेको छ भने थप एक थान कटुवा पेस्तोल र ३०३ राइफलको राउण्ड ४ थान गोली पनि वरामद भएको प्रहरीले जनाएको छ । यस्तै, एमपिआर लेखेको सञ्चार सेट २ थान पनि प्रहरीले वरामद गरेको छ । यस्तै घटनामा प्रयोग भएको अटो रिक्सा, मोटरसाइकल, विभिन्न ब्राण्डमा मोवाइल ८ थान र १६ हजार १ सय पनि वरामद भएको प्रहरीले जनाएको छ ।

Tags

Related Articles

Leave a Reply

Your email address will not be published.

Back to top button