समाचारस्वास्थ्य

जङ्गली हात्तीको आक्रमणबाट एक जनाको ज्यान गयो

झापा,

जङ्गली हात्तीको आक्रमणबाट एक जनाको ज्यान गएको छ । झापा जिल्लाको कमल गाउँपालिकामा गए राति जङ्गली हात्तीको आक्रमणले १ वृद्धको मृत्यु भएको हो । मृत्यु हुनेमा कमल गाउँपालिका वडा नं. ५ स्थित टुक्रेका ५८ वर्षीय रोहित रेग्मी रहेको इलाका प्रहरी कार्यालय दमकका प्रहरी निरीक्षक भवनबाबु खड्काले जानकारी दिए ।

गए राति करिब २ बजेतिर नजिकैको रतुवा माईवृक्षरोपण आयोजनाको जङ्गलबाट आएको दुई हात्तीले परिवारसहित बस्दै आएका रेग्मीको छाप्रामा आक्रमण गरेकाले रेग्मीको मृत्यु भएको प्रहरी खड्काको भनाई छ । छाप्रामा एक्कासी हात्तीले आक्रमण गरेपछि ज्यान बचाउन भागेका रेग्मीलाई हात्तीले लखेटेर मारेको अवस्थामा शव भेटिएको प्रहरी निरीक्षक खड्काले बताए । रेग्मीका श्रीमती र एक नातिनी भने भागेर ज्यान जोगाउन सफल भएका थिए ।

सशस्त्र प्रहरीको जग्गामा छाप्रो बनाएर बसोबास गर्दै आएका रेग्मीलाई छाप्रोबाट केही पर हात्तीले कुल्चिएर मारेको पाइएको तथा राति नै स्थानीयवासीले हात्तीलाई जङ्गलतर्फ नै धपाएको कमल–५ का वडाध्यक्ष डम्बरबहादुर निरौलाले जानकारी दिए ।

Related Articles

Leave a Reply

Your email address will not be published.

Back to top button